“Sumqayıt” komandası “Şahin” hərbi-idman oyunlarında iştirak edib. Bu haqda 16 iyun tarixində Sumqayıt24 Gənclər İdman İdarəsinə istinadən xəbər verir.
Mingəçevirdə “Şahin” hərbi-idman oyunlarının final mərhələsi baş tutub. Kür Olimpiya Tədris-İdman Mərkəzi ərazisində hazırlanmış xüsusi zonada təşkil edilən oyunda gənclər və idman naziri Fərid Qayıbov, Mingəçevirin icra başçısı İlham İsmayılov və Müdafiə Nazirliyinin idarə rəisi polkovnik Elşad Əbilov iştirak ediblər.
Turnir iştirakçıları yarış keçirilən zonaya Azərbaycan bayrağı ilə hərbi orkestrin ifası altında təntənəli marşla keçiblər. Xüsusi təyinatlı hərbçilərin nümunəvi çıxışlarından sonra yarış iştirakçılarının mübarizəsinə start verilib.
Yekun nəticələrə əsasən, qalib adını "İsmayıllı" komandası qazanıb. İkinci yeri "Sumqayıt", üçüncü yeri isə "Nizami" komandaları tutub.
Yarışda Müdafiə Sənayesi Nazirliyi tərəfindən tabeli birlik və müəssisələrdə istehsal olunan müxtəlif növ silahların, sursatların və Pilotsuz Uçuş Aparatlarının xüsusi sərgisi təşkil edilib.
