Sumqayıtda tələbə qızı oğurlayan Sadiq Nəbiyev (şərti) hökmdən apellyasiya şikayəti verib. Sumqayıt24 bu haqda 15 may tarixində Pravda.az-a istinadən xəbər verir.
Şikayət Bakı Apellyasiya Məhkəməsinin hakimi Azər İsmayılovun sədrliyi ilə araşdırılacaq. İlkin hazırlıq iclası mayın 16-na təyin edilib.
29 yaşlı Sadiq Nəbiyev 30 oktyabr 2021-ci ildə saat 12:30-da Sumqayıt şəhər avtovağzalında idarə etdiyi mikroavtobusa sərnişin kimi əyləşmiş SDU tələbəsi Aminə Niyazovanı (şərti) yaşadığı Şamaxı rayonuna aparacağını deyib, lakin onu aldadaraq başqa yerə aparıb. Onun məqsədi evlənmək olub.
Belə ki, Sadiq Stansiya Sumqayıt qəsəbəsi ərazisində ailə üzvlərinə zəng etmək istəyən qızın mobil telefonunu sındırıb. Bundan sonra Aminə mikroavtobusun açıq qapısından qaçmağa cəhd göstərib. Lakin Sadiq zərərçəkmişi tutub və qapını bağlayıb. Bu zaman qızın sağ ayağı qapı arasında qalıb.
Bundan başqa, Sadiq Nəbiyev zərərçəkmiş şəxsi fiziki zor tətbiq etmək hədəsi ilə Quba rayonunun Yerfi kəndi ərazisinə aparıb. Həmin yerdə onu 31 oktyabr saat 8:00 radələrinədək mikroavtobusun içərisində saxlayıb. Bununla da adam oğurluğu cinayətini törədib.
Sumqayıt Ağır Cinayətlər Məhkəməsinin hökmü ilə o, 6 il müddətinə həbs olunub. Sadiq cəzasını ümumi rejimli cəzaçəkmə müəssisəsində çəkəcək.
