Sumqayıt Ağır Cinayətlər Məhkəməsində dələduzların məhkəməsi olub. Sumqayıt24 bu haqda 8 fevral tarixində Apa.az-a istinadən xəbər verir.
Şəhid anasına və digər şəxslərə qarşı dələduzluqda ittiham edilən Nuranə Orucova və Sabrina Süleymanovanın cinayət işlərinə hakim Fəhmin Hümbətov baxıb.
Məhkəmə prosesində çıxış edən prokuror Samir Məmmədov onların dəymiş ziyanı ödədiklərini nəzərə alaraq, cinayət məsuliyyətindən azad olunmalarını istəyib.
Daha sonra hökm oxunub. Bildirilib ki, şəhid anasına dəymiş ziyanın tam ödənilməsi təmin edilib, qadın təqsirləndirilən şəxslə barışdığını, ondan heç bir şikayətinin olmadığını bildirib.
Hökmə əsasən, təqsirləndirilən Nuranə Orucova barəsində polis nəzarətində olma qətimkan tədbiri ləğv olunub, cinayət işinə xitam verilib. Məhkəmə ona 2000 manat məbləğində cərimə tətbiq edib. Cərimənin 6 ay ərzində ödənməli olması haqda qərar çıxarılıb.
Sabrina Süleymanovanın cinayət işinə də xitam verilib.
Qeyd edək ki, ötən prosesdə vurulan zərərin tam ödədildiyi açıqlanıb və bu barədə qəbz məhkəməyə təqdim edilib. Bu səbəbdən zərərçəkmişlər təqsirləndirilənlərdən şikayətçi olmadıqlarını açıqlayıblar və məhkəməyə barışıq ərizəsi təqdim edilib.
Xatırladaq ki, araşdırmalar zamanı məlum olub ki, Xaçmaz rayon sakini Nuranə Orucova həmkəndlisi Sabrina Süleymanova ilə əlbir olaraq müxtəlif şəxslərə onları məktəbdə işə düzəldəcəklərinə dair vədlər verib. Bunun qarşılığında onlardan müxtəlif məbləğlərdə pul alıblar.
Onlar vətəndaşlara qarşı ümumilikdə 20 min manat məbləğində dələduzluq etməkdə təqsirli bilinirlər.
N. Orucova və S. Süleymanova şəhid anası Zabilə Musayevaya qarşı da dələduzluqda ittiham olunurlar. N. Orucova Vətən müharibəsində şəhid olan Əliheydər Hüseynlinin anasına zəng edərək özünü Müdafiə Nazirliyinin vəzifəli şəxsi kimi təqdim edib. Onu inandırıb ki, oğlu sağdır və əsirlikdədir. N. Orucova Əliheydərin sağ-salamat gələcəyi vədini verərək Z. Musayevadan 4000 manat pul alıb.
Təqsirləndirilən şəxslər istintaq müddətində vətəndaşlara vurduqları ziyanın 12 min manatını ödəyiblər.
Qeyd edək ki, Əliheydər Hüseynli Vətən müharibəsində Füzuli, Xocavənd, Cəbrayıl və Qubadlı uğrunda gedən döyüşlərdə vuruşub. O, Xocavənddə gedən döyüşlər zamanı həlak olub. Şəhid “Vətən uğrunda”, “Döyüşdə fərqlənməyə görə”, “Xocavəndin azad olunmasına görə” medallarına layiq görülüb.
