Sumqayıtda sürücü ilə parklanma nəzarətçisi arasında pul üstündə dava olub.
Lent.az-ın məlumatına görə, hadisə 11-ci məhəllədə, "Sevgilim" şadlıq sarayının yaxınlığında baş verib.
48 yaşlı Masallı rayon sakini Bəşir Quliyev (ad və soyad şərtidir) mübahisə zamanı sürücünün üz nahiyəsinə yumruqla zərbə vurub. Nəticədə zərərçəkən yerə yıxılıb və müxtəlif dərəcəli xəsarətlər alıb.
Bu əməlinə görə, Bəşir Quliyev barəsində Cinayət Məcəlləsinin 128-ci (qəsdən sağlamlığa yüngül zərərvurma) maddəsilə cinayət işi açılıb.
Təqsirləndirilən şəxs ifadəsində bildirib ki, bibisi oğlu "Sevgilim" şadlıq sarayının yanında parklanma nəzarətçisi (parkovşik) işləyir:
"Gecə saat 10-11 radələrində toydan çıxan şəxs avtomobilinə yaxınlaşdı və bibim oğluna 2 ədəd 50 qəpik verib "Sənə heç bu da düşmür" dedi. Sonra da onun valideynlərini təhqir etdi. Mən də oturub çay içirdim. Yaxınlarımın təhqir olunmasına dözmədim və onlara yaxınlaşdım. Bibim oğlunu söyən şəxsin başının arxasına sillə vurdum, başı maşına dəydi"".
Bəşir Quliyev əlavə olaraq bildirib ki, zərərçəkənlə barışıq əldə olunub və ona qarşı şikayəti yoxdur.
Zərərçəkənin sözlərinə görə isə, içkili olduğu üçün maşını idarə etməyi Cavid adlı şəxsə tapşırıb:
"Cavidə pul verdim ki, "parkovşik"ə versin. 2 ədəd 50 qəpiyi "parkovşik"ə verəndən sonra, məbləğin az olduğuna işarə edərək, dilənçi olmadığını dedi. Mən də onlara dedim ki, burda əziyyət çəkdikləri üçün pul verirəm, yoxsa sizə pul verməli deyiləm. Onlar məndən 2 manat istədilər. Cavab verdim ki, Sumqayıtın heç yerində 2 manata parklanma yoxdur. Bundan sonra onlar məni söydülər. Ola bilsin ki, içkili olduğum üçün mən də söyüş söymüşəm. Mübahisə zamanı mənə 3 yumruq zərbəsi vuruldu, xəstəxanada başıma 8 tikiş qoyulub".
Zərərçəkən də təqsirləndirilən şəxsə qarşı şikayətinin olmadığını bildirib.
Sumqayıt şəhər Məhkəməsinin qərarı ilə cinayət işinə xitam verilib və Bəşir Quliyev məsuliyyətdən azad olunub.
