Sevgilisini bıçaqlayan qadının cinayət işi üzrə məhkəmə istintaqı başa çatıb. Sumqayıt24 bu haqda 17 may tarixində Pravda.az-a istinadən xəbər verir.
Sumqayıt Ağır Cinayətlər Məhkəməsində hakim Aynur Rzayevanın sədrliyi ilə keçirilən prosesdə Günay Həsənovaya (şərti) hökm oxunub. Ona 3 il müddətinə azadlığın məhdudlaşdırılması (elektron qolbaq) cəzası təyin edilib. Barəsində seçilmiş başqa yerə getməmək haqqında iltizam qətimkan tədbiri hökmü qanuni qüvvəyə minənədək dəyişdirilmədən saxlanılıb.
İttihama görə, hadisə Yaşıldərə bağlar massivində baş verib.
Belə ki, 22 yaşlı Günay Həsənova evinin mətbəxində olan zaman sevgi münasibətində olduğu Qalib Məmmədovla (şərti) qısqanclıq zəminində mübahisə edib. Qalib səbəbsiz qısqanclıq etdiyinə görə qadından ayrılacağını bildirib. Günay da bundan əsəbiləşərək mətbəx bıçağı ilə kişinin döş qəfəsinin sol yarısının arxa tərəfindən bir dəfə zərbə vurub.
Ona qarşı Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə ittiham irəli sürülüb.
