Sumqayıtda yeniyetmənin ölümünun bəzi təfərrüatları üzə çıxıb. Sumqayıt24 bu haqda 1 aprel tarixində Bizim.media-ya istinadən xəbər verir.
13 yaşlı Əli Babaşovun atası dünyasını dəyişib, anasının isə əqli geriliyi var. Ailəyə adının bilinməsini istəməyən qonşu qadın himayədarlıq edir. Sözügedən xanım yeniyetmənin narkotikdən ölməsi məlumatını yalanlayıb:
“Bura çəkilişə gələnlər olmuşdu, icazə vermədik deyə gedib yalan məlumatlar yayıblar. Əli mənim yanımda böyüyüb, 13 yaşında uşaq necə narkotik çəkə bilər?! Uşaq 8 martda xəstələndi, dünən isə keçindi. Xəstələndiyi gün Təcili Yardım da çağırdıq, dedilər ki, heç nəyi yoxdur”.
Qadının sözlərinə görə, Əli Babaşov bir ay əvvəl qızılca keçirsə də, sağalmışdı:
“Qəfildən yenə xəstələndi. Öskürürdü, soyuqlamışdı, sistem alıb köçürtdürdük. Həkim isə qorxulu heç nə olmadığını demişdi. Amma uşaq dünən rəhmətə getdi. İndi isə Əlinin ölüm kağızını ala bilmirik. Anasının imkanı olmadığına görə Əli məktəbə getmirdi. Xəstələnənə qədər o, salfetka sataraq anasına kömək olmağa çalışırdı. Amma martın 8-dən bu yana daha heç yerə getmirdi, evdə idi”.
