Bu gün birinci xanım Mehriban Əliyevanın doğum günüdür.
Mehriban Arif qızı Əliyeva 1964-cü il avqustun 26-da Bakı şəhərində ziyalı ailəsində anadan olub.
Əliyeva 1981-ci ildə Bakı şəhəri 23 №-li orta məktəbi bitirib və N.Nərimanov adına Azərbaycan Dövlət Tibb İnstitutuna daxil olub. Burada təhsilini başa vurduqdan sonra o, İ.M.Seçenov adına Birinci Moskva Dövlət Tibb İnstitutunda təhsilini davam etdirib. Mehriban Əliyeva, həmçinin burada 1988-1990-cı illərdə “Göz xəstəlikləri” ixtisası üzrə kliniki ordinatura keçib. O, 1990-1995-ci illər ərzində Moskvada akademik Krasnovun rəhbərliyi ilə Göz Xəstəlikləri Elmi-tədqiqat İnstitutunda çalışıb.
Mehriban Əliyeva hazırda onun təşəbbüsü ilə 1995-ci ildə təsis olunan Azərbaycan Mədəniyyət Fonduna rəhbərlik edir. 1996-cı ildə o, Azərbaycan, ingilis və rus dillərində çap olunan “Azərbaycan – İrs” jurnalını təsis edib. Əliyeva 2002-ci il oktyabrın 7-də Azərbaycan Gimnastika Federasiyasının (AGF) prezidenti seçilib.
Mehriban xanım 2004-cü il may ayının 10-da rəsmi açılışı olan Heydər Əliyev Fonduna rəhbərlik edir. O, 2004-cü ildən UNESCO-nun və 2006-cı ildən ISESCO-nun Xoşməramlı səfiridir. 2004-cü ilin dekabrında isə Azərbaycan Respublikası Milli Olimpiya Komitəsinin IV Baş Məclisində MOK-nın İcraiyyə Komitəsinə üzv seçilib. Bundan başqa, 2004-cü ildən Yeni Azərbaycan Partiyası Siyasi Şurasının üzvü, 2013-cü ildən isə Partiyanın sədr müavinidir.
Mehriban Əliyeva 2005, 2010 və 2015-ci illərdə üçüncü, dördüncü və beşinci çağırış Azərbaycan Respublikasının Milli Məclisinin deputatı seçilib.
Əliyeva 2017-ci il fevralın 21-də Azərbaycan Respublikasının Birinci vitse-prezidenti vəzifəsinə təyin olunub. Mehriban Əliyeva Azərabycanda və dünyada fəaliyyətinə görə bir çox orden və medallara layiq görülüb.
