2020-ci ilin noyabrın 6-sı gün ərzində və 7-nə keçən gecə Ermənistan silahlı qüvvələrinin bölmələri cəbhənin müxtəlif istiqamətlərində Ordumuzun mövqelərini və yaşayış məntəqələrimizi müxtəlif atıcı silahlar, top və minaatanlardan atəşə tutdu.
Döyüş əməliyyatları əsasən cəbhənin Ağdərə, Ağdam və Xocavənd istiqamətlərində müxtəlif intensivliklə davam edirdi. Düşmən bir sıra sahələrdə şəxsi heyət və hərbi texnikada itkilər verərək geri çəkilməyə məcbur edilib.
Ağdərə istiqamətində Ermənistan silahlı qüvvələrinin 5-ci dağatıcı alayının mövqeləri Ordumuz tərəfindən artilleriya atəşinə tutuldu. Nəticədə düşmən arasında ölən və yaralananlar oldu, bir neçə avtomobil texnikası və minaatan qurğusu sıradan çıxarıldı. Ordumuzun əməliyyatı zamanı düşmənin 6-cı dağatıcı alayının 1-ci taboru da itkilər verdi, D-30 artilleriya divizionunun 3-cü batareyasının topları məhv edildi.
Məğlubiyyətini qəbul etməyən düşmən döyüş meydanında uğursuzluqlarının acığını dinc əhalidən çıxmağa çalışırdı. 7 noyabrda Ermənistan silahlı qüvvələrinin bölmələri Tərtərin Şıxarx qəsəbəsini, Qazyan və Hüsənli kəndlərini, Ağcabədinin Yuxarı Qiyaməddinli, Ağdamın Çullu və Çıraqlı, Bərdənin Əyricə kəndlərini artilleriya atəşinə tutdu. Nəticədə bir mülki şəxs həlak oldu.
Ermənistan mediası isə guya Azərbaycanın Qubadlı rayonu ərazisindən Ermənistanın Qafan şəhəri yaxınlığındakı David Bek kəndinin atəşə tutulması barədə məlumat yaydı. Müdafiə Nazirliyi bu xəbərin dezinformasiya olduğunu açıqladı. Əksinə, məhz Ermənistan silahlı qüvvələri Ermənistan ərazisindən Qubadlının işğaldan azad olunmuş kəndlərini və Ordumuzun mövqelərini intensiv atəşə tuturdu.
Azərbaycan Ordusu isə yalnız öz sərhədlərimiz daxilində düşmənin atəş nöqtələrinə qarşı adekvat cavab tədbirləri görürdü.
Döyüşlər davam edərkən Müdafiə Nazirliyi işğaldan azad olunan kəndlərimizdən videogörüntülər paylaşırdı. 7 noyabrda Cəbrayıl rayonunun azad edilmiş kəndlərinin görüntüləri yayımlandı.
Günün ən sevindirici xəbəri isə Prezident, Ali Baş Komandan İlham Əliyevdən gəldi. Dövlət başçısı "Twitter" hesabında Füzulinin Yuxarı Veysəlli, Yuxarı Seyidəhmədli, Qorqan, Üçüncü Mahmudlu, Qacar, Divanalılar; Cəbrayılın Yuxarı Məzrə, Yanarhac; Qubadlının Qəzyan, Balasoltanlı, Mərdanlı; Zəngilanın Beşdəli; Xocalının Qarabulaq, Moşxmaat və Xocavəndin Ataqut, Tsakuri kəndlərinin işğaldan azad edildiyini elan etdi.
Vətən müharibəsinin ən böyük və sevincli xəbərini eşitməyimizə isə artıq cəmi iki gün qalırdı.
