Ötən gün Sumqayıtda arvadını qətlə yetirən kişi ilə bağlı yeni faktlar məlum olub.
Lent.az-ın məlumatına görə, bu, arvadını öldürən Ağabala Babışovun ilk cinayəti deyil.
Belə ki, araşdırmalar zamanı məlum olub ki, o, bundan əvvəl də bir neçə dəfə məhkum olunub.
Hətta müəyyən edilib ki, A.Babışov həyat yoldaşını öldürməzdən bir müddət əvvəl bir nəfərin qulağını kəsib. Buna görə ona Cinayət Məcəlləsinin 127-ci maddəsi ilə ittiham irəli sürülüb. Həmin cinayət işinin həm ibtidai istintaqı, həm də məhkəmə istintaqı zamanı zərərçəkmiş şəxsin vəkili tərəfindən Ağabala Babışovun barəsində həbs qətimkan tədbirinin seçilməsinə dair vəsatət verilsə də, məhkəmə həmin vəsatəti təmin etməyib. Onun barəsində “başqa yerə getməmək haqqında iltizam” qətimkan tədbiri seçilib.
Yaxınları bildirir ki, həmin cinayətə görə məhkəmə onu həbs etsəydi, bu ağır cinayət yaşanmazdı.
Çünki bir neçə dəfə cinayət törətməyə görə məhkum edilib, hazırda isə başqa bir cinayət törətməyə görə təqsirləndirilən şəxsin azadlıqda qalması, bir növ, onun hazırkı cinayət əməlini törətməsinə zəmin yaradıb.
Qeyd edək ki, hadisə şəhərin 12-ci mikrorayonunda qeydə alınıb.
