Sumqayıt şəhərində yerləşən "Bağça Şəhər" yaşayış kompleksində su təchizatı ilə bağlı problem yaşanır.
Sumqayit24.az-a müraciət edən sakinlərin sözlərinə görə, son bir həftədir mənzillərə su gün ərzində cəmi 6 saat verilir. Hazırda su təchizatı yalnız 06:00–09:00 və 18:00–21:00 saatları arasında həyata keçirilir.
Bildirilib ki, bununla bağlı kompleksin komendantlığı girişlərdə elan yerləşdirib. Elanda qeyd olunur ki, kompleksə verilən suyun təzyiqinin aşağı olması səbəbindən su anbarlarını lazımi səviyyədə doldurmaq mümkün deyil. Bu səbəbdən sakinlərin su ilə təminatını davam etdirmək məqsədilə müvəqqəti olaraq su qrafiki tətbiq edilib.
Sakinlər problemin qısa müddətdə aradan qaldırılmasını və su təchizatının əvvəlki qaydada bərpa olunmasını gözlədiklərini bildirirlər.
Məsələ ilə bağlı İri Şəhərlərin Birləşmiş Su Təchizatı Xidmətinə sorğu ünvanlanıb. Qurumdan bildirilib ki, kompleksin ümumi qidalanma xəttində nasazlıq olduğu üçün hazırda işlər görülür, bu səbəblə suyun təzyiqi azdır, yaxın bir neçə gün ərzində təmir işləri başa çatan kimi suyun verilişi əvvəlki qaydada bərpa ediləcək.
