"Beton zavod" ərazisində yaşayan sakinlər təşvişə düşüblər. Sumqayıt24 bu haqda 7 iyun tarixində xəbər verir.
“Azərenerji” ASC-nin Sumqayıt Yüksək Gərginlikli Elektrik Şəbəkəsindən onlara bildiriş göndərilib və “qanunsuz zəbt edilmiş ərazini” qısa müddətdə boşaltmaları tələb olunub.
“Azərenerji” ASC-nin Sumqayıt Yüksək Gərginlikli Elektrik Şəbəkəsindən məsələ ilə bağlı Xezerxeber.az-a bildirilib ki, sakinlərin heç biri evindən çıxarılmayacaq və belə bir plan yoxdur:
“Hazırda həmin ərazidə köhnə xətlər yeniləri ilə əvəzlənir. Bu iş ona görə həyata keçirilir ki, köhnə xətlər qırılaraq sakinlərin həyatı üçün təhlükə yaratmasın. Digər tərəfdən, həmin ərazidə əvvəldən yaşayan sakinlərin heç biri mənzilindən çıxarılmır. Amma yüksəkgərginlikli elektrik xətlərinin altında bundan sonra ev tikilməsinə icazə verilməyəcək”.
Qeyd olunub ki, bildirişlər baş mühəndis tərəfindən tərtib edilib və yalnız yüksəkgərginlikli elektrik xətlərinin altında yeni tikilməkdə olan evlər üçün nəzərdə tutulub. Bildirişlərin köhnə mənzillərə verilməsində isə səhvlik olub.
