Əri tərəfindən öldürülən qız Sumqayıtda oxuyubmuş. Sumqayıt24 bu haqda 26 iyul tarixində xəbər verir.
Xırdalanda yaşayan 22 yaşlı Ayşən Kazımovanı həyat yoldaşı Hüseyn Kazımov binanın 8-ci mərtəbəsinin eyvanından atıb. Özünü mərhumun anası kimi təqdim edən qadın bəzi detallara aydınlıq gətirib:
"Mənim qızım Sumqayıt Dövlət Universitetində oxuyub. Hüseyn mənim qızımı təhsildən yarımçıq qoydu. 3-cü kursdan onu universitetdən çıxartdı. Onun başını yedi, ağlını oğurladı. Qızımı məktəbindən etdi, apardı. Apardığı bir gündən sonra da onun başına hicab bağladı. Qızım namaz qılırdı. Mən qızımın evinə sərbəst gedib-gələ bilmirdim. Mənim qızım necə xəyanət edə bilər axı?
Evin iki açarı var idi. Bu açarın biri qızımda, digəri isə həyat yoldaşında qalırdı. Hüseyn evdə olmadığı zaman məni belə evə tək gəlməyə qoymurdu”.
Qeyd edək ki, bir müddət öncə yayılan videoda Hüseyn Ayşəni xəyanətdə ittiham etmişdi. Şahidlərin sözlərinə görə, qız ölüm ayağında olarkən xəyanət etmədiyini, ərinin ona inanmadığını bildirib.
