Sumqayıtda gənc rəssam Mehriban Əliyevanın “Mənim rəngli dünyam” adlı sərgisi keçirilib. Sumqayıt24 bu haqda 9 may tarixində xəbər verir.
Fərdi xarakter daşıyan sərgi Dövlət Rəsm Qalereyası tərəfindən Heydər Əliyev Mərkəzində təşkil olunub. Moderator, yazıçı-dramaturq, kulturoloq Hafiz Ataxanlı böyük zəka sahibi, görkəmli dövlət xadimi Heydər Əliyevin mədəniyyət və incəsənətə göstərdiyi qayğıdan danışıb.
Sumqayıt Regional Mədəniyyət İdarəsinin rəis müavini İlham Əhmədov, aktivist sənətçilər birliyinin Azərbaycan təmsilçisi, tanınmış rəssam Nəvai Metin, Abşeron-Xızı Regional Təhsil İdarəsində metodkabinetin müdiri Gülbahar Haqverdiyeva, 15 nömrəli məktəbin direktoru Elmira Yaqubova, əməkdar həkim Kamil İbadov, şəhid anası Sürəyya Mehdiyeva, “Sumqayıt” qəzetinin baş redaktoru Sübhan Quliyev, Neft Akademiyasının müəllimi Məzahir Babayev, rejissor-operator Etibar Bənnayev, gənc rəssamın atası Elman Əliyev sərginin təşkili və gənc rəssamın çeşidli işləri barədə ürək sözlərini deyiblər.
Çıxışlarda Mehriban Əliyevanın ebru, akvarel, qrafika, yağlı boya kimi üslublarda işlərinin spesifik cəhətləri qeyd olunub. Onun sənət müəllimləri İntiqam Cəfərova, Sevda Bənnayevaya minnətdarlıq bildirilib.
Gənc rəssama Gənclər və İdman Baş İdarəsinin, Dövlət Rəsm Qalereyasının fəxri fərmanları və təhsil aldığı 15 nömrəli məktəbin xatirə hədiyyəsi verilib.
Sonda Ə. Bakıxanov adına 1 nömrəli Uşaq İncəsənət Məktəbinin kollektivi musiqi nömrələri ilə çıxış ediblər.
