İllər keçsə də, Sumqayıtda küçə itləri mövzusu gündəmdən düşmür.
Sumqayit24.az xəbər verir ki, şəhərdə günü-gündən itlərin sayı artır, məktəb və bağçalarının həyətləri, istirahət guşələri bu dördayaqlılar tərəfindən zəbt edilir. Sahibsiz itlərin əksəriyyəti təhlükəsiz olsa da, insanlara cumanların sayı az deyil.
Bəzən sakinlər, əsasən də uşaqlar heyvanları provokasiya edir, digər hallarda isə dilsiz canlılar yaşadıqları ərazini “qoruyur” və ya quduz olur.
Redaksiyamız tərəfindən və digər yerli KİV-lərdə dəfələrlə itlərin amansızca öldürüldüyünə dair materiallar yayımlanıb. İnsanlar yerli idarəetmə qurumlarının sığınacaq yaratmaq yerinə heyvanları güllələməsindən, zəhərləyib öldürməsindən ciddi narazılıq edir.
Məsələn, Azərbaycanda sahəsi və əhali sayına görə Sumqayıtla müqayisə ediləcək Gəncə şəhərində “Yuva” adlı sığınacaq yaradılıb. Sözügedən müəssisə Gəncə İctimai İştirakçılıq Məclisinin ideya və təşəbbüsü, həmçinin Gəncə Şəhər İcra Hakimiyyəti, Gəncə şəhər Kəpəz Bələdiyyəsi və Gəncə şəhər Mənzil Kommunal Təsərrüfatı İstehsalat Birliyinin dəstəyi ilə təsis olunub.
Bəs “gənclik şəhəri”nin nəyi əskikdir? Niyə sumqayıtlılar və buradakı heyvanlar əziyyət çəkməli, qorxu içində yaşamalıdırlar (ölməli)?
