Sumqayıtda ana dörd körpəsi ilə küçədə qalıb. Bu haqda 11 aprel tarixində Sumqayıt24 Oxu.az-a istinadən xəbər verir.
Hadisə şəhərin 13-cü mikrorayon ərazisində baş verib. Aygül Məhərrəmova 6, 5, 3 və 2 yaşlı üç oğlan, bir qız övladları ilə kirayə pulunu ödəyə bilmədiyi üçün evdən çıxarılıb. Onlar hazırda əşyaları ilə bərabər küçədə qalıblar. Qonşular tərəfindən ailəyə ərzaq yardımı olunub.
“Əvvəl Novxanıda kirayə qalırdıq, sonra başqa bir bağa köçdük. Ərim evin yiyəsi ilə münaqişə etdiyinə görə, bağı boşaltmalı olduq. Yoldaşımgilin rayonda evi var, amma şərait yoxdur. Dedi, mən bacarmıram, çıxın həyatımdan. Öz başımı götürüb gedirəm. Sən də balalarını götür neynirsən elə” - A. Məhərrəmova söyləyib.
Məsələ ilə bağlı məlumatlandırılan Sosial Xidmətlər Agentliyinin əməkdaşları bildiriblər ki, ailə müvəqqəti olaraq sığınacaqla təmin ediləcək.
