Bakıdan Sumqayıta qayıdan sakinlər hər gün eyni mənzərə ilə üzləşirlər – izdiham və avtobusa minmək uğrunda mübarizə.
Sumqayit24.az-a müraciət edən sakinlərin sözlərinə görə, ötən həftə "manatlıq" taksilərin yığışdırılmasından sonra vəziyyət daha da pisləşib. Xüsusilə iş və dərs saatlarının sonunda 20 Yanvar metrostansiyasının yaxınlığında 594 nömrəli Bakı–Sumqayıt ekspres avtobusuna minmək müşkül məsələyə çevrilir.
Avtobuslar uzun intervalla gəldiyi üçün dayanacaqda çoxlu sayda insan toplanır. Növbəti avtobus gəldikdə isə sərnişinlər arasında sıxlıq və itələşmə başlayır.
Sakinlər deyirlər ki, yaranmış vəziyyətdə kim daha tez və çevik hərəkət edirsə, avtobusa minə bilir, digərləri isə növbətini gözləməli olur.
Sərnişinlərin əsas tələbi pik saatlarda 594 nömrəli marşrut üzrə avtobusların sayının artırılması və intervalın azaldılmasıdır.
Məsələ ilə bağlı "BakuBus" MMC-yə sorğu ünvanlanıb.
