Sumqayıt şəhəri, Xəzri bağları adlanan yaşayış massivində dəm qazından zəhərlənən 6 uşaq yenidən xəstəxanaya yerləşdirilib.
Bu barədə Qafqazinfo.az-a uşaqların atası Kamil Cəbrayılov məlumat verib. 9 uşaq atası olan 39 yaşlı Kamil bildirib ki, bu xəbəri eşidib işdən evə gələndə özü də qəzaya düşüb:
"Qonşu zəng edib bu xəbəri yanlış formada verib. Mənə 6 uşağın öldüyünü deyib. Mən də qışqıra-qışqıra, həyəcanla evə gələndə qəzaya düşdüm. Qəza nəticəsində motosikletin təkərləri yararsız hala düşdü. Evdə də tək işləyən mənəm. Uşaqlarımdan böyüyünün 16 yaşı var, ən kiçiyi isə 6 aylıqdır. Bu gün uşaqlarımı yenidən xəstəxanaya gətirdik. Çünki evdə vəziyyətləri yaxşı deyildi. Heç nə yeyə bilmirlər".
Ata qeyd edib ki, hər bir uşağa görə 140 manat məbləğində uşaqpulu alırlar. Yəni ümumilikdə ailə əsasən bu ödənişdən faydalanır. Aldıqları pulla evlərinin aylıq kredit ödənişini edirlər. Lakin bundan başqa heç bir sosial yardım verilmir. Bunun səbəbi isə ailənin adına pay torpaqlarının olmasıdır.
