Sumqayıt şəhəri, Heydər Əliyev parkının çıxışında ərazi hasarlanıb.
"Bravo” supermarketinin arxasında aparılan tikinti işləri sakinlərin marağına səbəb olub. Bəs görəsən, sumqayıtlıların ən çox üz tutduğu yerlərdən biri olan Heydər Əliyev parkında nə tikilir?
Xeberle.com mövzu ilə bağlı Sumqayıt şəhər İcra Hakimiyyəti ilə əlaqə saxlayıb. Qurumdan bildirilib ki, ərazidə kommunikasiya xətlərinin yeri dəyişdirilib.
Redaksiyanın məlumatına görə, sözügedən parkda Əmək və Əhalinin Sosial Müdafiəsi Nazirliyinin tabeliyindəki "DOST Mərkəzi" tikilir. Bu səbəbdən ərazi hasara alınıb. Dayanıqlı və Operativ Sosial Təminat Agentliyi 2023-cü ildə tikintinin aparılması ilə bağlı açıq tender elan edib. Agentlik platforma üçün 140 min manat ödəyəcək. Müqavilənin icrası imzalandığı gündən 15 ay müddətində nəzərdə tutulub.
Xeberle.com məsələ ilə bağlı Dayanıqlı və Operativ Sosial Təminat Agentliyi ilə də əlaqə saxlayıb. Qurumdan cavab olaraq bildirilib ki:
"DOST mərkəzləri barədə məlumatlar ƏƏSMN-nin, eləcə də DOST Agentliyinin rəsmi saytında və sosial media hesablarında mütəmadi olaraq dərc olunur. Həmin kommunikasiya kanallarını izləyərək yeniliklər barədə məlumat əldə edə bilərsiniz”.
