Samur–Abşeron kanalında batan Vətən müharibəsi qazisi Abusət Əliyevin axtarışları davam edir. Bu haqda 15 avqust tarixində Sumqayıt24 Bizim.media-ya istinadən məlumat verir.
Hadisə avqustun 9-u gecə saatlarında Stansiya Sumqayıt adlanan ərazidə qeydə alınıb. 26 yaşlı Abusət Əliyev yolda hərəkətdə olarkən idarəetməni itirərək avtomobili kanala aşırıb. Maşın sudan çıxarılsa da, Abusət Əliyev tapılmayıb.
Onun qardaşı Babək Əliyev bildirib ki, Abusət suda batarkən yanında 2 şəxs olub və həmin şəxslər sudan çıxıblar:
"Maşın həqiqətən də kanala düşmüşdü. Qardaşımla birlikdə 3 nəfər olublar. 2 nəfər çıxarılıb. Onların necə çıxarıldığı müvafiq qurumlar tərəfindən araşdırılır. Qardaşım ortalıqda yoxdur, 7 gündür səbir edirik. Fövqəladə Hallar Nazirliyinə, yerli icra hakimiyyətinə, "Azərsu"ya yaxınlaşıram, hamısı deyirlər ki, onların nəzdindən çıxıb. Getmədiyimiz qurum, bölmə qalmayıb".
Samur–Abşeron Kanalının İstismarı İdarəsindən bildirilib ki, hadisə baş verən gün dərhal əraziyə baxış keçirilib, texnika vasitəsilə avtomobil sudan çıxarılıb. Bir sutka ərzində suyun səviyyəsi minimum həddə endirilib. Avqustun 14-də isə Abusət Əliyevin ailəsi ilə görüş keçirilib və bununla bağlı müvafiq orqanlara məlumat verilib.
