Səməd Vurğun adına Mərkəzi Kitabxananın oxucuları ekskursiyada olublar. Bu barədə 28 iyul tarixində Mədəniyyət Xəbərləri adlı səhifəyə istinadən xəbər veririk.
Ekskursiya 2 avqust - Milli Kino Gününə həsr olunub. Kitabxana oxucuları Cəfər Cabbarlı adına “Azərbaycanfilm” kinostudiyasında və Dövlət Film Fondunda unudulmaz bir gün keçiriblər. İştirakçılar Cəfər Cabbarlının abidəsini ziyarət etdikdən sonra kino rəssamı Əziz Məmmədovun bələdçiliyi ilə geyim, rekvizit və butaforiya sexlərinə baş çəkiblər. Məşhur Azərbaycan filmlərində istifadə olunan geyim və rekvizitlərlə tanışlıq ziyarətçilərdə xoş təəssürat yaradıb. Sonra səsləndirmə və dublyaj şöbəsinin mütəxəssisi Mehman Nadirov oxuculara bədii filmlərdə, dublyaj materiallarında səslərin, habelə müxtəlif kənar səslərin yazılma prosesini əyani şəkildə izah edib.
Sonda uşaqlar Dövlət Film Fondunun direktoru, tanınmış kinorejissor, Əməkdar incəsənət xadimi Cəmil Quliyevlə xatirə şəkli çəkdiriblər.
