Mehdi Hüseynzadə adına stadionda yenidənqurmadan sonra keçirilən ilk qarşılaşmadan 1 il keçir.
Sumqayit24.az xəbər verir ki, “Sumqayıt" futbol klubunun bir il ərzində keçirdiyi 21 qarşılaşmanı ümumilikdə 72.230 tamaşaçı canlı izləyib. Bu da hər oyuna ortalama 3450 nəfər deməkdir.
Bu matçlarda ən çox azarkeş sayı ötən mövsüm baş tutan “Sumqayıt” – “Qarabağ” (Premyer Liqanın XXXII turu - 9300 tamaşaçı), “Sumqayıt” – “Qəbələ” (Premyer Liqanın XXXVI turu - 9300 tamaşaçı) və cari mövsümün əvvəlində oynanılan “Sumqayıt” – “Fehervar” (UEFA Konfrans Liqasının II təsnifat mərhələsi - 9200 tamaşaçı) olub. Ən az azarkeş isə bu mövsüm Azərbaycan Kubokunun 1/8 final mərhələsində baş tutan “Sumqayıt” – MOİK qarşılaşmasında qeydə alınıb - 400 nəfər.
Ötən ilin bu günü komanda doğma stadionda “Neftçi” üzərində 2:1 hesablı qələbə qazanaraq arenaya gələn azarkeşlərini sevindirib. Bu oyunların 19-u Misli Premyer Liqası, 1-i Azərbaycan Kuboku, 1-i isə UEFA Konfrans Liqasının II təsnifat mərhələsində baş tutub. Sumqayıtlılar bu qarşılaşmaların 10-da qələbə çalıb. Qalan 3 matç heç-heçə və 8 məğlubiyyətlə yadda qalıb.
