Novxanı qəsəbəsindən “Azadlıq” metro stansiyasına gedən 123 saylı avtobus qrafikə uyğun işləmir. Sumqayıt24 bu haqda 3 avqust tarixində ATV-yə istinadən xəbər verir.
İnsanlar 30-40 dəqiqə dayanacaqda gözləməli olurlar. Avtobusların uzun intervalla işləməsindən əlavə, köhnə olmağı da ayrı bir problemdir.
Marşrutun sürücüsü və dispetçeri bildiriblər ki, intervalın uzanma səbəbi onlardan asılı deyil. İnterval 17 dəqiqədir, lakin tıxaclar üzündən 20-25 dəqiqəyədək uzanır. Hazırda xətdə 7 avtobus var.
123 saylı xəttə cavabdeh şəxsin sözlərinə görə isə avtobuslar 15 dəqiqə intervalla işləyir. Sərnişin sayı az olur. Marşrut xətti yaxın vaxtlarda müsabiqəyə çıxarılacaq.
Yerüstü Nəqliyyat Agentliyindən (AYNA) də problemlə bağlı açıqlama verilib:
“123 saylı müntəzəm marşrut üzrə hazırda 6 avtobus 21-30 dəqiqə intervalla fəaliyyat göstərir. Marşrut şəbəkəsinin optimallaşdırılması işləri çərçivəsində 123 saylı marşrut xətti müsabiqəyə təqdim edilib. Məqsəd bu marşrutda fəaliyyət göstərən sərnişindaşıma tələblərinə cavab verməyən, o cümlədən köhnə, istismara yararsız avtobusların yeniləri ilə əvəzlənməsidir”.
