Xəbər verdiyimiz kimi, Sumqayıtda “yeni növ” oğrular peyda olub. Onlar gecə saatlarında mənzillərin qapılarını qırıb və oğurluq ediblər.
İnsanlarda haqlı olaraq mühüm suallar yaranır: həmin şəxslər müəyyən evlərdə adamların olub-olmadığını haradan bilirlər? Bu tip oğrulardan necə qorunmaq olar?
Aparılan araşdırmalara görə, bayram və tətil günlərində oğurluq halları artır. Çünki insanların əksəriyyəti bu günlərdə şəhərdəki evlərini tərk edir, rayonlara və ya xaricə yollanır.
Oğruların köməkçisi - qəbzlər və xüsusi vərəqələr
Oğruların ən böyük “silah”ı evlərin qapısına sıxışdırılmış elektrik, qaz borcları qəbzləridir. Onlar bu qəbzlərə əsasən ev sahiblərinin evdə olub-olmadığını müəyyənləşdirirlər. Tutaq ki, həmin qəbz üç gün qapıda qalırsa, bu, evin oğruya “məni soy” mesajı verməsi deməkdir. Ya da başqa bir üsul.
Oğrular sahibinin evdə olmadığından şübhələndikləri evin qapısı ağzına özləri kiçik bir kağız, ya da kiçik bir ip yerləşdirirlər. Növbəti günlərdə o kağız, ya da ip yerə düşürsə, bu, “qapı açılıb və ev sahibi evdədir” anlamına gəlir. Odur ki, tətilə - bağa, rayona, xaricə gedənlər yaxın bildikləri qonşularından, qohumlarından qapılarına nəzarət etməyi xahiş edə bilərlər.
Bunları etsəniz, oğrudan qorunacaqsız
Araşdırmalar onu da göstərir ki, oğrular üçün daha bir ipucu qaranlıq düşəndə yanmayan ev işıqlarıdır. Polislər məsləhət görürlər ki, evdəki bəzi lampalara müasir texnologiyanın köməyi ilə zaman tənzimlənməsi qoyulsun. Yəni lampa müəyyən saatdan sonra bir müddət işləsin.
Həmçinin açıq qalmış qapı, pəncərə oğurluq üçün ideal zəmin yaradır. Odur ki, evinizin ətrafından içəriyə baxın. Bahalı əşyaların pəncərədən görünməməsinə diqqət yetirin. Əgər yoldan keçən biri bunları asanlıqla görürsə, oğrular da görə bilər.
Bütün qapı-pəncərələri ayrı-ayrı bağlayın. Qapıların arxasına isə ekstra sürgü taxdırın. Sanki evdəymiş kimi görünün.
Bəzi pərdələri sanki evdə biriləri varmış kimi açıq qoyun. Hamısını bərk-bərk bağlasanız, evdə olmadığınız dərhal anlaşıla bilər.
Bu üsullar oğrulardan qorunmağınıza 100 faiz zəmanət olmasa da, bir çox hallarda onların qarşısını ala bilər.
