Saray qəsəbəsində insanların ən sıx məskunlaşdığı ərazidə səki yoxdur.
Sumqayit24.az-a müraciət edən "Saray-H" MTK yaşayış kompleksinin sakinləri bildiriblər ki, hər gün yolu keçərkən, habelə Bakıya getmək üçün 508 nömrəli avtobusa minmək üçün dayanacağa gələrkən həm çətinlik, həm də real təhlükə ilə üzləşirlər.
"Məsul qurumun əməkdaşları yolu genişləndirmək adı ilə qazdılar, indi isə nə səkinin, nə də bordürün olacağını bildirirlər. Yol tamamilə toz-torpaq içindədir. Yağış yağan kimi isə ərazi palçığa görə keçilməz olur.
Buradan hər gün yüzlərlə sakin, o cümlədən məktəbli uşaqlar və yaşlı insanlar istifadə edir. Səki olmadığı üçün insanlar avtomobil yoluna çıxır, maşınların arasında dayanmalı olur. Bu isə istənilən an faciəyə səbəb ola bilər.
"Ölüm-itim olmasa, tədbir görülməyəcək?" – deyə narazı sakinlər məsul qurumlardan problemin təcili həllini tələb ediblər.
