Magistral yolda baş vermiş qəzada xəsarət alanların vəziyyəti açıqlanıb. Bu haqda 3 avqust tarixində Sumqayıt24 xəbər verir.
Xəstəxanaya hospitalizasiya olunan 19 nəfərdən 14-ü artıq ambulator müalicə üçün evə buraxılıb. Digər 5 nəfərin isə müalicəsi tibb müəssisəsinin müvafiq şöbələrində davam etdirilir.
Onlardan qapalı kəllə-beyin travması, sol dizin qapalı sınığı diaqnozları ilə Reanimasiya şöbəsində müalicəsi davam etdirilən 31 yaşlı Orxan Nəsirovun vəziyyəti ağır qiymətləndirilir. Həmin şöbədə qapalı kəllə-beyin travması diaqnozu ilə müalicə alan 63 yaşlı Həqiqət Cəfərovanın vəziyyəti orta ağırdır.
Qapalı kəllə-beyin travması və baş-beyin silkələnməsi diaqnozları qoyulan 38 yaşlı Səidə Kərimovanın və 36 yaşlı qadının müalicəsi isə Neyrocərrahiyyə şöbəsində davam edir. Vəziyyətləri orta ağır qiymətləndirilir.
44 yaşlı Vüsalə Məmmədova isə sağ qabırğanın sınığı diaqnozu ilə Travmatologiya şöbəsində müalicə alır və vəziyyəti orta ağırdır.
