Sumqayıtda istehsal edilən məhsullar Qarabağda geniş istifadə olunur. Sumqayıt24 bu haqda 27 iyun AzTV-yə istinadən xəbər verir.
Texniki Avadanlıqlar zavodunun bölmə rəisi Elvin Məmmədov bildirib ki, Laçının Zabux kəndinin qurulmasında zavodun məhsullarından, yəni su hidrantları, yerüstü yanğın hidrantları, yeraltı yanğın hidrantları və sürgülü siyirtmələr, yağış suyu barmaqlıqlarından istifadə olunur.
Texniki avadanlıqlar, Polietilen məmulatları və Dəmir boru zavodları “Azertexnolayn” MMC-nin tərkibində fəaliyyət göstərir. Burada hazırlanan məhsullardan işğaldan azad edilən və tikinti işləri aparılan ərazilərdə istifadə olunur. Bu isə öz növbəsində zavodlarda istehsalın artmasına təsir göstərir.
Qeyd edək ki, “Azertexnolayn”ın illik istehsal həcmi 12 min tonu keçib. Müəssisənin məhsulları Avropanın 10-dan çox ölkəsinə, eləcə də Özbəkistana, Qazaxıstana da ixrac edilir.
