H.Z. Tağıyev qəsəbəsi, Şah İsmayıl Xətai küçəsində yerləşən 46 saylı binanın sakinləri evlərinin yaxınlığında obyektin tikintisindən narazıdırlar.
“Evimin pəncərəsinin qarşısında çayxana tikirlər. Bura avara adamlar toplaşacaq, bütün səs-küy də evimin içində olacaq. Narazılıq edirik, deyirlər ki, pul vermişik, özümüz bilərik,” ‒ deyə sakinlər şikayətlənirlər.
Sakinlər həmçinin ərazidəki ağacların kəsildiyini də iddia edirlər.
Məsələ ilə bağlı Sumqayıt Şəhər İcra Hakimiyyətindən bildirilib ki, sözügedən ərazidə aparılan tikinti tam qanuni əsaslara malikdir və müvafiq icazə sənədləri mövcuddur. Eyni zamanda, həmin ərazidə hansısa ağacın kəsilməsi faktı qeydə alınmayıb.
