Azərbaycan Yazıçılar Birliyi (AYB) Sumqayıtda “Ruhumuzun binəsi” adlı mədəniyyət festivalı keçirib. Bu haqda Sumqayıt24 xəbər verir.
Tədbir 13-cü mikrorayonda İcra Hakimiyyəti, Sumqayıt Dövlət Rəsm Qalereyasının təşəbbüsü, S. Vurğun adına Mərkəzi Kitabxana və N. Gəncəvi adına Kitabxana Klubunun təşkilatçılığı ilə baş tutub.
İlk növbədə qonaqlara ulu öndər Heydər Əliyevin həyat və fəaliyyətini özündə əks etdirən kitab və rəsm sərgisi nümayiş olunub.
Yazıçı, ssenarist, kulturoloq Hafiz Ataxanlı, AYB Sumqayıt bölməsinin sədri Gülnarə Cəmaləddin, İcra Hakimiyyətinin şöbə müdirinin müavini Fərman Kazımov, Heydər Əliyev Mərkəzinin direktoru Vüsalə Qurbanova, Sumqayıt Dövlət Rəsm Qalereyasının müdiri Ellada Həsənova ulu öndərin siyasi fəaliyyəti ilə yanaşı, Azərbaycan mədəniyyəti üçün gördüyü işlərdən danışıblar.
Sonra bir neçə şair şeirlərini səsləndirib.
Milli Qəhrəman Polad Həşimov adına 28 nömrəli məktəbin və Qubadlı rayon Xıdırlı kənd məktəbinin şagirdləri Heydər Əliyevə və Müstəqillik Gününə həsr olunmuş şeir və mahnıları ilə tədbirə rəng qatıblar.
Sonda iştirakçılar S. Vurğun adına Mərkəzi kitabxananın oxucusu Dəniz İsmayılzadənin ifasında Hafiz Ataxanlının ssenarisi əsasında hazırlanmış "Xurşidbanu Natəvanın “Şuşa düşüncələri bu gün" adlı monotamaşaya baxıblar.
