Yusif Məmmədəliyev adına 31 nömrəli məktəbdə "Erkən nikah məişət zorakılıqlarının başlıca amillərindəndir" mövzulu tədbir keçirilib. Sumqayıt24 bu haqda 3 iyun tarixində Sumqayıt Tibb Mərkəzinə (STM) istinadən xəbər verir.
4 nömrəli Ailə Sağlamlıq Mərkəzinin (ASM) və məktəbin təşkil etdiyi görüşə şagirdlər və valideynlər qatılıblar. Tibb ocağının ailə həkimi pediatr Nərmin Əmirova erkən nikahların fəsadlarından, sağlamlığa vurduğu ziyanlardan danışıb.
Gələcək nəsillərin sağlamlıq vəziyyətinin yeniyetmə qızların – gələcək anaların sağlamlıq vəziyyətlərindən birbaşa asılı olduğu vurğulanıb. Pediatr bildirib ki, yeniyetməlik dövründə orqanizm inkişaf etdiyi üçün bir çox xroniki xəstəliklər kəskinləşir.
Sumqayıt Şəhər Polis İdarəsinin Yetkinlik yaşına çatmayanlarla profilaktik işin təşkili bölməsinin inspektoru kapitan Asudə Əliyeva isə hüquq-mühafizə orqanlarının bu sahədə həyata keçirdiyi tədbirlərdən danışıb.
Sonda şagirdlərin sualları cavablandırılıb.
