Sumqayıtda şair İbrahim Hacıyevin (İlyaslı) 60 illik yubileyinə həsr olunan tədbir keçirilib. Bu haqda 8 aprel tarixində Sumqayıt24 Regional Mədəniyyət İdarəsinə istinadən xəbər verir.
Sumqayıt Dövlət Dram Teatrında keçirilən tədbirdə MM Mədəniyyət komitəsinin sədri Qənirə Paşayeva, Millət vəkili Müşviq Məmmədli, Sumqayıt ŞİH-nin başçısının birinci müavini Teymur Səmədov, xarici ölkələrdən gələn qonaqlar, şəhər ictimaiyyətinin çoxsaylı nümayəndələri və oxucular iştirak ediblər.
Çıxış edənlər şairi 60 illik yubileyi münasibətilə təbrik ediblər. Yubilyarın həyat və yaradıcılığından ətraflı söz açaraq onu çağdaş poeziyamızın öndə gedən nümayəndələrindən biri, uzun zaman ümumtürk ədəbiyyatına öz töhfələrini verən bir tərcüməçi olaraq dəyərləndiriblər və ona qiymətli hədiyyə təqdim ediblər. Teymur Səmədov yubilyarın bu günlərdə icra başçısı tərəfindən qəbul edilərək Fəxri Fərman və qiymətli hədiyyə ilə mükafatlandırıldığını qeyd edib.
Daha sonra Dünya Gənc Türk Yazarları Birliyinin başqanı, şair İntiqam Yaşar çıxış edərək, şairi 60 illik yubileyi münasibətilə təbrik edib və onu DGTYB-nin 25 illik Yubiley Medalı ilə təltif edib.
Tədbirin sonunda çıxış edən yubilyar tədbirin təşkil olunmasında əməyi keçən hər kəsə dərin təşəkkür və minnətdarlığını bildirib və “Zəfər Marşı” şeirini səsləndirib.
