Sumqayıt şəhəri ilə Saray qəsəbəsini birləşdirən körpünün tikinti işləri sürətlə davam etdirilir.
Sumqayit24.az xəbər verir ki, bu barədə Azərbaycan Avtomobil Yolları Dövlət Agentliyi (AAYDA) məlumat yayıb.
Həyata keçirilən işlər çərçivəsində Saray qəsəbəsi tərəfdən kənar və iki orta dayaqların tikintisi üzrə işlər tam olaraq yekunlaşıb (svaylar, təməllər, sütunlar, sütunlar üzərində riqellər). Həmçinin körpünün birinci aşırım hissəsinin tirləri tam şəkildə quraşdırılıb (16 ədəd, hər birinin uzunluğu 33 metr), üzərində armatur karkası toxunaraq betonlanıb.
Hazırda körpünün orta aşırımı üzrə tirlərin quraşdırılması prosesi gedir (16 ədəd, hər birinin uzunluğu 28 metr) və paralel olaraq Sumqayıt şəhəri tərəfdə kənar dayağın armaturlanması və betonlanma işləri aparılır.
Körpünün əhəmiyyəti nəzərə alınaraq tikinti işlərinin təyin olunmuş vaxtda yekunlaşdırılması üçün AAYDA tərəfindən əraziyə lazımi sayda canlı qüvvə və texnika cəlb edilib.
Qeyd edək ki, Prezident yeni körpünün tikintisi üçün 9 milyon 960 min manat vəsait ayırıb.
