Sarayda Modul tipli Vərəm Əleyhinə Xəstəxananın açılışı olub. Bu haqda 24 may tarixində Sumqayıt24 Report.az-a istinadən xəbər verir.
Açılış mərasimində TƏBİB-in və İcbari Tibbi Sığorta üzrə Dövlət Agentliyinin rəhbər şəxsləri, Abşeron rayon icra başçısı Abdin Fərzəliyev, sözügedən xəstəxananın direktorları, əməkdaşları və s. iştirak ediblər.
200 çarpayı fondu olan xəstəxana inzibati hissə, infeksion xəstəliklər korpuslarından (modul) və köməkçi sahələrdən (qazanxana, yeməkxana, camaşırxana, oksigen anbarı) ibarətdir. Tibb ocağı mərkəzləşdirilmiş oksigen generator sistemi ilə təchiz olunub. Otaqların birində vərəmli xəstələrin müalicəsində xüsusi rolu olan oksigen kompressoru yerləşir və palatalara oksigen ötürülür.
Müalicə alan xəstələrə həkim-diyetoloqun nəzarəti altında səhər, günorta, axşam yeməkləri veriləcək. Tibb müəssisəsi bütün lazımi şərait, təminat-təchizat və kadr potensialı ilə təmin edilib.
