Sumqayıtda “Daha yaxşı kommunikasiya üçün mediasiyanın effektivliyindən necə istifadə edə bilərik?” mövzusunda tədbir keçirilib. Sumqayıt24 bu haqda 6 aprel tarixində xəbər verir.
Tədbir Sumqayıt Dövlət Universiteti (SDU) və Mediasiya Şurası tərəfindən təşkil olunub. Burada professor-müəllim və tələbə heyəti ilə yanaşı, Mediasiya Şurasının üzvləri - Sumqayıt 1 saylı Mediasiya Təşkilatının rəhbəri Etibar Həsənov və həmin təşkilatın mediatoru Elçin Hüseynov iştirak ediblər.
Məruzə edən SDU-nun baş hüquqşünası, dosent Əminə Həsənova sosial leksikonumuza yeni daxil olan mediasiya barədə ətraflı məlumat verib. Əminə Həsənova mediasiyanın mübahisələrin məhkəmədənkənar həlli yolu olduğunu diqqətə çatdırıb, proses zamanı tərəflərin mediatorun (vasitəçinin) köməyi ilə digər tərəfin mövqeyi barədə daha çox məlumat qazanmaqla öz mövqeyini yenidən qiymətləndirmək və barışıq imkanları qazanmaq fürsəti kimi dəyərləndirib.
Bildirilib ki, mediasiya proseslərində tərəflərin mübahisəni həll etmələri ehtimalı 85%-dən yüksəkdir. Bu istiqamətdə ölkəmizdə hüquqi baza yaradılıb.
1 saylı Mediasiya Təşkilatının rəhbəri Etibar Həsənov və mediatoru Elçin Hüseynov mövzu üzrə çıxış ediblər. “Cəmiyyət, mediasiya dövrünün adaptasiya mərhələsini yaşayır”- deyən Etibar Həsənov mediasiyanın populyarlaşması üçün maarifləndirmə işinin vacibliyini vurğulayıb. Xüsusilə gənclərin oynaya biləcəyi roldan danışıb.
Mediator Elçin Hüseynov mediasiyanın mülki, kommersiya, ailə, əmək, inzibati hüquq münasibətlərindən irəli gələn mübahisələr üzrə aparıldığını qeyd edib.
Sonda mediasiyanın əlçatanlığı, rüsumlar, nikah müqaviləsinin bağlanılması, vərəsəlik hüququ, alimentlərin verilməsi və digər mövzularla bağlı tələbələrin sualları cavablandırılıb, onların təklifləri dinlənilib.
