Sumqayıt Dövlət Universitetinin (SDU) tələbələri üçün ekskursiya təşkil olunub. Sumqayıt24 bu haqda 29 mart tarixində xəbər verir.
Ekologiya mühəndisliyi və Ekologiya ixtisasları üzrə təhsil alan 25 nəfər bakalavr və magistrant “Azərkimya” İB-yə gediblər. İlk növbədə onlar təhlükəsizlik texnikası qaydaları ilə təlimatlandırılıblar.
Sonra İB-nin Sağlamlıq, əməyin təhlükəsizliyi və ətraf mühitin mühafizəsi şöbəsinin böyük mühəndisi İlham Məhərrəmov qonaqları istehsal prosesi ilə tanış edib. Müəllim və tələbələrə ayrı-ayrı sexlərdə gedən proseslər, o cümlədən alınan yan məhsullar və tullantıların utilizasiyası haqqında məlumat verilib.
Kimya və biologiya fakültəsinin ekoloq tələbələrdən ibarət növbəti qrupu isə Ekologiya kafedrasının əməkdaşlarının müşayiəti ilə Aqrar Xidmətlər Agentliyində ekskursiyada olublar. Agentliyin direktoru Əli İbrahimov onlara təşkilat barədə məlumat verib, sonra isə şöbələrə yönləndirib.
“Təmiz Şəhər” ASC-nin üç müxtəlif istehsal müəssisələrinə də maraqlı ekskursiya təşkil olunub. İctimaiyyətlə əlaqələr şöbəsinin müdiri – mətbuat katibi Orxan Cabbarovun müşayiəti ilə Bakı bərk məişət tullantılarının yandırılması zavodunda tələbələr məişət tullantılarının utilizasiyası, istehsalatın iş prinsipi ilə tanış olub, daha sonra isə Balaxanı bərk məişət tullantılarının çeşidlənməsi zavoduna yola düşüblər. Onlar tullantıların vaxtaşırı zavoda daşınması, emalı prosesini, həmçinin çeşidlənməni həm monitorlarla, həm də əyani olaraq görüblər.
Balaxanı sənaye parkı ilə tanışlıq zamanı gənc ekoloqlar tullantılardan müxtəlif çeşidli hazır məhsulların (məmulatların, qabların və s.) alınması prosesini də müşahidə ediblər.
