Sumqayıtda bir sıra qəzetlərdə çalışmış, "Qızıl qələm" mükafatçısı İldırım Dəmirli 79 yaşında vəfat edib. Bu haqda Aqreqator.az-da məlumat paylaşılıb.
Tanınmış qələm sahibi, Azərbaycan Jurnalistlər və Yazıçılar birliklərinin üzvü, Əməkdar jurnalist olan Dəmirli iş həyatını 1958-ci ildə Sumqayıtda tikinti idarəsində fəhləlikdən başlayıb. 1963-cü ildə istehsalatdan ayrılmadan Sumqayıt Kimya-Texnologiya texnikumunu, 6 il sonra isə BDU-nin jurnalistika fakültəsini bitirib.
O, jurnalist karyerasını 1968-ci ildə başlayıb. Əvvəlcə İldırım Sumqayıtın çoxtirajlı "Kimyaçı" qəzetində məsul katib vəzifələrində işləyib. Daha sonra, "Sosialist Sumqayıtı" qəzetində əməkdaş kimi çalışıb. Həmçinin o, bir neçə kitab müəllifi idi.
53 ilini mətbuata həsr edən İldırım Dəmirli 1972-ci ildən SSRİ Jurnalistlər İttifaqının, 2012-ci ildən Azərbaycan Yazıçılar Birliyinin üzvü idi. O, 2010-cu ildə “Qızıl qələm” media mükafatı ilə təltif olunub. 2017-ci ildə "Əməkdar Jurnalist" fəxri adına layiq görülüb.
