Sumqayıt məktəblərinə istiliyin verilməsinə başlanılıb. Bu barədə bu gün, 16 noyabr tarixində Dünya TV məlumat yayıb.
Məlumata əsasən, 2021-2022-ci tədris ilində payız qış mövsümünə hazırlığın yoxlanılması məqsədi ilə əvvəlcədən monitorinqlər aparılıb. Monitorinq zamanı istilik xətləri, radiatorlar yoxlamadan keçirilib və aşkarlanmış nöqsanların aradan qaldırılması üçün operativ tədbirlər görülüb.
Sumqayıtda fəaliyyət göstərən körpələr evi və uşaq bağçaları noyabrın 1-dən, Mətləb Quliyev adına 3 nömrəli tam orta məktəb isə dünəndən istiliklə təmin edilib. Həmçinin, 21 nömrəli bağçada istiliyin təmin olunması məqsədilə sıradan çıxmış radiatorlarda təmir işləri aparılıb, xətlər yenilənib.
Ümumi təhsil müəssisələrinin istilik təminatı Nazirlər kabineti müvafiq qərarına əsasən hər il ənənəvi olaraq noyabrın 15-dən başlayır və aprelin 15-dək davam edir.
