Sumqayıtda 4280 m² sahəsi olan 4 saylı xəstəxanada (Bərpa) yanğın baş verib. Zərərçəkənlər var. Sumqayıt24 bu haqda Fövqəladə Hallar Nazirliyinin (FHN) saytına istinadən xəbər verir.
Yanğın, Səməd Vurğun küçəsində yerləşən dördmərtəbəli xəstəxananın birinci mərtəbəsində baş verib. Burada olan otağın və dəhlizin yanar konstruksiyaları 134 m² sahədə yanıb.
Əraziyə cəlb olunan yanğınsöndürənlər tərəfindən 32 nəfər (xəstə) xilas edilib, 49 nəfər (xəstə və personal) təhlükəsiz əraziyə təxliyə olunub. Qeyd edək ki, 15 nəfər tüstüdən zəhərlənmə əlamətləri ilə digər xəstəxanaya çatdırılıb.
FHN əməkdaşları tərəfindən alov söndürülüb və binanın qalan hissəsi yanğından mühafizə olunub.
Həmçinin, müxbirimizin verdiyi məlumata əsasən yanğına səbəb elektrik qovşağındakı qısaqapanma olub.
Bundan əlavə, hadisə yerinə şəhər İcra Hakimiyyətinin başçısı Zakir Fərəcov da gəlmişdir.
