Sumqayıt bulvarına işləyən avtobuslar sərnişin tələbatını ödəmir.
Sumqayit24.az xəbər verir ki, Sahil küçəsində çoxsaylı yaşayış kompleksləri, binalar inşa edilib. Əhali günü-gündən çoxalır. Ərazidən 2 və 6 nömrəli marşrut xətlərinin avtobusları keçsə də, onlar yalnız 2 saylı Sumqayıt "ASAN xidmət" mərkəzinə kimi hərəkət edirlər. Yəni, Mehdi Hüseynzadə adına stadionun yaxınlığında yaşayan vətəndaşlar “ASAN xidmət”də düşüb, evlərinə piyada getməli olurlar.
Problem təkcə bunda deyil. Belə ki, 6 nömrəli avtobusların aztutumlu olması, habelə şəhərin bir çox yerindən keçməməsi sakinlərə çətinlik yaradır. Onlar bir yerə getmək üçün bəzən iki dəfə marşrut dəyişməli olurlar.
Həmçinin hər iki marşrut üzrə hərəkət edən avtobuslar bulvar ərazisinə “ağzına kimi” dolur gəlir.
“Bir neçə marşrut xəttinin nəqliyyat vasitələrini yenilədilər. “6 nömrə”yə yeni, iri avtobusların verilməsini və onların son dayanacağının elə bulvarın qurtaracağında olmasını xahiş edirik”, - deyə yerli sakinlər bildiriblər.
