Sumqayıtda “Zəfər dolu həmrəylik günü və əsrə bərabər 18 il” adlı görüş baş tutub. Bu haqda DünyaTV-yə istinadən xəbər veririk.
Sözügedən tədbir Corat qəsəbəsi 7 nömrəli tam orta məktəbdə keçirilib. Burada ilk öncə, hər iki Qarabağ müharibəsində şəhid olmuş, eyni zamanda Coratda anadan olub boya-başa çatmış 12 şəhidin adlarına sinif otaqları açılıb. Açılış mərasimində şəhidlərimizin yaxınları, İcra Hakimiyyətinin nümayəndələri və məktəbin kollektivi iştirak ediblər.
Şəhid anaları, məktəblilər həmin sinif otaqlarının girişində asılan qırmızı lentləri kəsərək, onları açıq elan ediblər.
Daha sonra, məktəbin akt zalında şagirdlər şəhidlərimizin qəhrəmanlığı haqda danışıb, vətənpərvərlik mövzusunda şeirlər deyib və mahnılar ifa ediblər.
Sonda isə, Rəfiqə Şəmsin “Bura Vətəndir” adlı kitabının təqtimatı baş tutub.
