Ekologiya və Təbii Sərvətlər Nazirliyi və Sumqayıt Dövlət Universitetinin birgə təşkilatçılığı ilə "Tullantıların düzgün idarə olunması və təkrar emal" mövzusunda maarifləndirici görüş keçirilib.
Sumqayit24.az xəbər verir ki, görüşdə ETSN-in Ekoloji maarifləndirmə və kommunikasiya şöbəsinin müdiri Səyyarə Məmmədova, Ekoloji siyasət şöbəsinin Tullantıların idarə edilməsi sektorunun müdiri Mehman Nəbiyev və şöbənin əməkdaşı Sənubər Səmədova, eləcə də "Təmiz Şəhər" ASC-nin Ətraf mühit və əməyin mühafizəsi şöbəsinin rəis müavini Elnur Əliyev çıxış edərək mövzu ilə bağlı təqdimat ediblər.
Görüşün məqsədi tələbələr arasında ekoloji mədəniyyətin və dayanıqlı inkişaf prinsiplərinin təbliği, tullantıların idarə olunması sahəsində həyata keçirilən tədbirlər, təkrar emal və çeşidlənmə proseslərinin əhəmiyyəti, tullantıların düzgün idarə edilməsinin ekoloji tarazlığa təsiri, həmçinin bu istiqamətdə qarşıda duran vəzifələr barədə məlumat vermək olub.
Eyni zamanda mütəxəssislər tərəfindən gənclərin ətraf mühit sahəsində təşkil edilən tədbirlərdə fəal iştirakının təbiətin mühafizəsinə və cəmiyyətdə ekoloji şüurun formalaşmasına töhfə verdiyi vurğulanıb.
