Sumqayıtda fəaliyyət göstərən 17 və 17A nömrəli avtobuslarla bağlı şikayət həllini tapa bilər.
Sumqayit24.az-a müraciət edən sakinlərin sözlərinə görə, sözügedən marşrutlar üzrə avtobusların hərəkət intervalı uzundur.
Bildirilib ki, bəzən sərnişinlərin gedəcəkləri ünvana çatması təxminən bir saat çəkir.
Sakinlər avtobusların köhnə olmasının da sərnişindaşımada çətinlik yaratdığını qeyd ediblər.
Məsələ ilə bağlı Azərbaycan Yerüstü Nəqliyyat Agentliyi redaksiyamıza açıqlama verib.
"Hazırda Sumqayıt şəhəri və ətraf əraziləri üzrə marşrut şəbəkəsinin təhlili və yenidən formalaşdırılması aparılır. Bu işlər çərçivəsində marşrutlar müsabiqəyə çıxarılır. Müsabiqə nəticəsində avtobusların yenilənməsi həyata keçirilir. Qeyd edilən xətlər üzrə də zəruri tədbirlərin görülməsi nəzərdə tutulub", - deyə açıqlamada qeyd olunub.
