Sumqayıt Dövlət Dram Teatrında 20 Yanvar hadisəsinə həsr olunmuş "Missiya" tamaşası nümayiş olunub. Bu barədə 21 dekabr tarixində Sumqayıt24 xəbər verir.
Tamaşadan öncə şəhidlərimizin xatirəsi bir dəqiqəlik sükutla yad edilib. Əsərdə Azərbaycanın Milli Qəhrəmanı, birinci Qarabağ savaşında şəhid olmuş leytenant Qorxmaz Eyvazovun obrazı canlandırılıb. Təqdim olunan tamaşa 44 günlük Vətən müharibəsinin iştirakçısı, Xüsusi Təyinatlı Dəstənin mayoru Mübariz Eyvazovun Şuşa uğrunda döyüşlərdə ağır yaralanaraq komaya düşməsi, ruhlar aləmində atası - 1992-ci ildə Şuşada şəhid olmuş leytenant Qorxmaz Eyvazovla görüşü, ata ilə oğulun söhbətlərindən bəhs edir.
Hafiz Ataxanlının qələmə aldığı qəhrəmanlıq dramına teatrın baş rejissoru, respublikanın Xalq artisti Firudin Məhərrəmov quruluş verib. Tamaşa alqışlarla qarşılanıb. Sonda yaradıcı heyət Fəxri Fərman və diplomla mükafatlandırılıb.
