Vətən müharibəsi şəhidinin körpə qardaşı sağalaraq evə buraxılıb. Sumqayıt24 bu haqda 20 iyun tarixində Sumqayıt Tibb Mərkəzinə (STM) istinadən xəbər verir.
Uşaq iyunun 4-də Masallı Rayon Mərkəzi Xəstəxanasında doğulub. Tənəffüs çatışmazlığı səbəbi ilə Sumqayıt Perinatal Mərkəzinə təxliyə olunub və süni ventilyasiya aparatına qoşulub.
Ondan zəruri müayinələr götürülüb və uğurlu müalicə aparılıb.
Qeyd edək ki, körpə şəhid Araz Seyfullayevin qardaşıdır. Araz Vətən müharibəsi zamanı Xüsusi Təyinatlı Qüvvələrin tərkibində Füzuli və Cəbrayıl rayonlarında döyüşüb. 4 oktyabr 2020-ci ildə şəhadətə ucalıb.
O, ölümündən sonra “Vətən uğrunda”, “Füzulinin azad olunması” və “Cəsur döyüşçü” medallarına layiq görülüb.
