Sumqayıt Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Rafael Budaqovun (soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Fəhmin Hümbətovun sədrliyi ilə keçirilən prosesdə hökm oxunub.
Məhkəmənin hökmü ilə ona şərti cəza verilib və məhkəmə zalından azadlığa buraxılıb.
İttihama görə, hadisə 12 mart 2024-cü il tarixdə, saat 20 radələrində Sumqayıt şəhərində yerləşən “Leon qəlyan” adlı tütün məhsulları mağazasında qeydə alınıb.
Belə ki, sərxoş vəziyyətdə olan Rafael Budaqov özünün icarəyə götürdüyü və satıcı kimi işlədiyi sözügedən mağazada əmisi oğlu, zərərçəkmiş Zaur Budaqovla (soyadı şərtidir) şəxsi münasibətlərin pozulması zəminində mübahisə edib. Bu zaman əmisi oğlu onun ünvanına nalayiq sözlər deyib təhqir edib. Nəticədə Rafael mətbəx bıçağı ilə Zaurub qarın nahiyəsinə qəsdən bir dəfə vuraraq ona xəsarət yetirib.
Hadisədən sonra Rafael Budaqov saxlanılaraq cinayət məsuliyyətinə cəlb edilib.
