Həbsdə olan jurnalist Cəmil Məmmədlinin apellyasiya şikayətinə baxılıb. Sumqayıt24 bu haqda 24 iyun tarixində Apa.az-a istinadən xəbər verir.
Proses Sumqayıt Apellyasiya məhkəməsində hakim Ruhiyyə Əsgərovanın sədrliyi ilə keçirilib. Qərara əsasən, Sumqayıt Ağır Cinayətlər Məhkəməsinin verdiyi 6 illik həbs hökmü qüvvədə saxlanılıb.
Xatırladaq ki, prokuror ötən ilin avqust ayında keçirilən prosesdə Cəmilin istintaqın gedişinə mane olduğunu, zərərçəkmişlərə müxtəlif üsullarla təsir etdiyini əsas gətirərək onun həbsini istəyib. Məhkəmə vəsatəti əsaslı hesab edərək jurnalist barəsində polisin nəzarəti altına vermə qətimkan tədbirini həbs qətimkan tədbiri ilə əvəzləyib.
Cəmil Məmmədli ötən ilin yanvarında cinayət məsuliyyətinə cəlb edilib.
O, Cinayət Məcəlləsinin 178.2.4 (dələduzluq-xeyli miqdarda ziyan vurmaqla törədildikdə), 182.2.1 (hədə-qorxu ilə tələb etmə - qabaqcadan əlbir olan bir qrup şəxs tərəfindən törədildikdə) 182.2.2 (təkrar hədə-qorxu ilə tələb etmə) və 221.2.2-ci ( xuliqanlıq) maddələri ilə ittiham olunub.
