Sumqayıt şəhər prokurorluğunda “Açıq qapı günü” baş tutub. Bu haqda 16 aprel tarixində Sumqayıt24 Baş Prokurorluğa istinadən məlumat verir.
Tədbirdə media qurumları və qeyri-hökumət təşkilatlarının nümayəndələri, eləcə də dövlət qurumları və hüquq-mühafizə orqanlarının əməkdaşları iştirak ediblər.
Çıxışlar zamanı şəhər prokurorluğunun fəaliyyəti, cinayətkarlığa qarşı aparılan mübarizə tədbirləri, ətraf mühitin mühafizəsi və ekoloji tarazlığın bərpa edilməsi istiqamətində gördüyü kompleks işlər barədə məlumat verilib.
İnzibati bina barədə məlumatlandırılan iştirakçılar burada əməkdaşlar üçün yaradılmış iş şəraiti ilə tanış olublar. “Elektron prokurorluq” informasiya sistemi əyani olaraq nümayiş olunub.
Kriminalistik avtomobil və avadanlıqlarla tanış olan qonaqlara istintaq hərəkətlərinin keçirilməsi zamanı müasir texnikadan istifadənin əhəmiyyəti izah olunub.
Sonda xatirə fotoşəkli çəkilib.
