TƏBİB-dən sorğumuza cavab olaraq bildirildi ki, Paşazadə Fatimə Fadil qızının şəxsi kabinetində - my.gov.az portalında səhvən 2024-cü ildə "Kreystfeld–Yakob xəstəliyi zamanı demensiya" diaqnozunun qeyd olunması faktı qeydə alınıb.
"Aparılan araşdırma zamanı müəyyən edilib ki, bu texniki yanlışlıq qeydiyyat mərhələsində baş verib. Belə ki, reyestrə təqdim edilən klinik diaqnoz Z02.1 kodu əvəzinə F02.1 kimi qeyd olunub.
Müvafiq şöbəyə və qeydiyyatçılara xəbərdarlıq edilib, gələcəkdə bu kimi halların təkrarlanmaması üçün əlavə nəzarət tədbirləri görülüb.
Bildiririk ki, vətəndaşın real klinik vəziyyəti ilə qeyd olunan diaqnoz arasında heç bir tibbi uyğunluq mövcud deyil və bu, sırf texniki səbəbdən baş vermiş qeyri-dəqiqlikdir.
18.10.2025-ci il tarixində sistemdə (e-tabib mobil tətbiqində) bu məlumatın düzəlişi üzrə müvafiq addımlar atılıb və my.gov.az platforması ilə sinxron yenilənmə işləri aparılır.
Yaxın günlərdə dəyişikliyin vətəndaşın my.gov.az platforması üzrə şəxsi kabinetində də əks olunması təmin ediləcəkdir", - deyə TƏBİB-dən bildirilib.
***
Sumqayıtda gənc qıza qoyulan səhv diaqnoz ciddi narazılıq yaradıb.
Sumqayit24.az xəbər verir ki, vətəndaş Fadil Paşayev "Facebook" hesabında qızının işə qəbul üçün aldığı tibbi arayışda ciddi uyğunsuzluq aşkarlandığını bildirib.
Onun sözlərinə görə, TƏBİB-in elektron sistemində qızının xəstəlik tarixçəsinə "Yakob xəstəliyi zamanı demensiya" diaqnozu qeyd edilib.
"Bu xəstəlik dünyada nadir hallarda rast gəlinir və sonuncu dəfə 1998-ci ildə Böyük Britaniyada qeydə alınıb. Belə bir xəstəlik yalnız ölü şəxsin beyin toxumasının laborator müayinəsi ilə müəyyən edilə bilər. Hələ mənim övladımın keçirdiyi stressi demirəm", - deyə Fuad Paşayev narahatlığını ifadə edib.
F.Paşayev məsələ ilə bağlı iki ay əvvəl Səhiyyə Nazirliyi və TƏBİB-ə müraciət etdiyini bildirib.
TƏBİB-in nümayəndəsi problemin Səhiyyə Nazirliyinin səhvi olduğunu qeyd edib, Sumqayıt Tibb Mərkəzi isə bu uyğunsuzluğu "texniki hərf səhvi" kimi qiymətləndirərək tez bir zamanda aradan qaldırılacağını vəd edib.
Lakin iki aydan çox müddət keçməsinə baxmayaraq, problem hələ də həll olunmayıb.
Şikayətçi sözügedən problemin tezliklə həll edilməsini tələb edir.
