Sumqayıtda müəssisə direktoru qanunsuzluqlara yol verir. Sumqayıt24 bu haqda 12 iyul tarixində xəbər verir.
Söhbət Etilen-polietilen zavodunun rəhbəri Oqtay Niftəliyevdən gedir. O, 12 ildən çoxdur ki, zavodun direktorudur. Ötən həftə onun əməkdaşlardan birini qanunsuz işdən çıxardığına görə cərimələndiyini bildirmişdik. Lakin məlum olub ki, bu, ilk belə cəza deyil.
Niftəliyev bənzər üsulla daha iki şəxsi işdən kənarlaşdırıb. Vətəndaş Elvin Cəlilinin redaksiyamıza verdiyi məlumata görə, hadisə fevral ayında yaşanıb. O, həmin vaxt zavodda növbə ustası idi:
“Tabeliyimdə olan işçi mənim və iş yoldaşımın elektron siqaret çəkdiyimiz yerdə videomuzu lentə alıb. Sonra sahə rəisi Mikayıl İbrahimov bizi yanına çağıraraq: “Ərizənizi yazıb çıxmasanız, sizi Əmək Məcəlləsinin 70-ci maddəsinin “Ç” bəndi ilə qovacağıq”, – deyə şantaj edib.
İlk öncə bizə sadə töhmət verdilər. Amma bir neçə gün sonra otaqlarına çağırıb ərizəmizi yazıb getməyimiz üçün iki saat verdilər. Bizə: “70ç” ilə çıxarsaq, heç yerdə işləyə bilməyəcəksiniz”, – dedilər. Qorxumuzdan sahə rəisinin diktə etdiyi, guya başqa yerdə işə düzəlmək istədiyimiz məzmunlu ərizə yazdıq.
Heç əməkhaqqının hesablanması belə düzgün aparılmadı. İşdən çıxan kimi Dövlət Əmək Müfəttişliyi Xidmətinə müraciət etdim. Araşdırmalardan sonra Oqtay Niftəliyevi cərimələdilər”.
Qeyd edək ki, Əmək Məcəlləsinin 70-ci maddəsinin “Ç” bəndində: “İşçi özünün əmək funksiyasını və ya əmək müqaviləsi üzrə öhdəliklərini yerinə yetirmədikdə, yaxud bu Məcəllənin 72-ci maddəsində sadalanan hallarda əmək vəzifələrini kobud şəkildə pozduqda”, – deyə yazılıb. 72-ci maddədə isə yalnız sərxoşedici içki və narkotik maddələr nəzərdə tutulur. Elektron siqarət barədə isə heç bir məlumat yoxdur.
Məlumata görə, ötən il Dövlət Ekoloji Təhlükəsizlik Xidməti də O. Niftəliyevi cərimələmişdi. Buna zavoddan tullantı sularının su hövzəsinə axıdılması səbəb olmuşdu.
