Sumqayıtda avtobuslardakı vəziyyət vətəndaşları boğaza yığıb.
Sumqayit24.az -a məsələ ilə bağlı müraciət edən şikayətçilər bildiriblər ki, “10A” nömrəli avtobusdakı vəziyyət olduqca acınacaqlıdır.
Belə ki, ilk növbədə sərnişinlər avtobusun hərəkət qrafikindən narazıdılar. Nəqliyyat vasitəsinin hərəkət intervalı bərbad olduğu üçün sərnişinlər gedəcəkləri ünvana daim gecikirlər.
“Avtobus sürücüsünə hərəkət qrafiki ilə bağlı sual verdik, cavabında isə 10 avtobusdan 4-ünün xarab olduğunu bildirdi. Bir neçə gündən sonra məktəblər açılacaq. Ondan vəziyyət necə olacaq?”,- deyə sərnişinlərdən biri bildirib.
Bundan əlavə, avtobuslardakı sıxlıq da vətəndaşları narahat edir.
“Avtobusa minmək və düşmək müşkül məsələyə çevrilib. O qədər adam yığırlar ki, sıxlıqdan nəfəs almaq mümkün deyil”,- deyə şikayətçi qeyd edib.
Vətəndaşlar yenə aidiyyəti qurumlardan məsələ ilə bağlı təcili tədbir görülməsini tələb edirlər.
