Azərbaycanda gələn ildən etibarən illik 200-250 ədəd elektrik mühərrikli avtobusun istehsalı planlaşdırılır.
Bu barədə Prezident İlham Əliyevin Sərəncamı ilə təsdiq olunan Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramında deyilir.
Gələn ildən ölkəmizdə bu qədər avtobusun istehsalı avtobus parkının yenilənməsinə və artmasına səbəb ola bilər. Hazırda paytaxtda 2800 avtobusa ehtiyac var.
Ötən il "Azərbaycan İnvestisiya Şirkəti" ASC (AİŞ), Çinin "BYD Company Limited" (BYD) və "SARDA Group" şirkətlərinə məxsus "Electrify Azerbaijan" arasında Anlaşma Memorandumu imzalanıb. Layihə çərçivəsində Azərbaycanda "BYD" şirkəti ilə elektrobusların yığılması və bir sıra ehtiyat hissələrinin istehsalının təşkili nəzərdə tutulur.
Sumqayıt Kimya Sənaye Parkının ərazisində ayrılan 5 hektar torpaq sahəsində tikilməsi planlaşdırılan zavodda ildə 150-200 ədəd elektrobusların istehsalı nəzərdə tutulur. Eyni zamanda istehsalat daxili tələbatı qarşılamaqla yanaşı, Azərbaycanın ixrac potensialını da artıracaq.
Azərbaycan Yerüstü Nəqliyyat Agentliyinin (AYNA) İdarə Heyətinin sədri Anar Rzayev Trend.az-ə müsahibəsində bildirib ki, paytaxtda avtobus parkı 2160 ədədə çatıb. Yaxın gələcəkdə bu rəqəmi 2500 avtobusa çatdırmaq niyyətindəyik.
Nəqliyyat məsələləri üzrə ekspert Fuad Əliyev isə elektrik mühərrikli avtobus istehsalı, sərnişindaşımaya müsbət təsir edəcəyini qeyd edib.
